Burberrys dúkkur

Skráði mig á samningatækninámskeið sem verður haldið í Háskólanum á Akureyri næstkomandi miðvikudag sem er svo sem ekki í frásögu færandi nema ég sat í erfidrykkju um daginn og tilkynnti öllum við borðið að ég væri að fara á samskiptatækninámskeið og skildi svo ekkert hvers vegna fólk var svona hissa og vandræðalegt á svip fyrr en einn borðfélagi spurði hvort ég væri mikið að lenda í útistöðum við fólk. Nema hvað mismælaröskun virðist vera eitthvað sem hrjáir helst kvenfólk í minni fjölskyldu sem er komið af Matthildi Jónsdóttur í beinan legg, hún er ókrýndur meistari mismælanna, þetta virðist reyndar ágerast í kringum breytingaskeið en því er ekki að heilsa í mínu tilfelli. Um daginn sátum við á kaffihúsi og allt í einu segir mamma með þunga í röddinni ” hann pabbi þinn þoldi aldrei þessar Burberrys dúkkur” litli tískufíkillinn ég spenntist upp við orðið eitt en fattaði um leið að auðvitað væri ættmóðirin að tala um barbídúkkur.Mamma var líka einu sinni í viðskiptum við KG banka á meðan aðrir landsmenn versluðu við KB banka, ókunnugir voru farnir að halda að hún hefði starfað fyrir sovésku leyniþjónustuna á tímum kalda stríðsins og ekki komist út úr því. Þetta er samt ekkert miðað við Gústa bróður sem reyndi ítrekað að hringja úr sjónvarpsfjarstýringunni minni þegar hann var eitt sinn í heimsókn hjá mér í Reykjavík. En hey! pabbi fór líka einu sinni með þverflautu í sund í staðinn fyrir skýlu og stóð svo í klefanum og klóraði sér í hausnum á meðan kallarnir hlógu og spurðu hvort hann hefði hugsað sér að halda tónleika. Þessi fjölskylda er samt alls ekki utan við sig, bara með hugann við annað.